उपल्लो मुस्ताङ र मुक्तिनाथ क्षेत्रमा हिमपातले विद्युत सेवा अवरुद्ध

यहाँको उपल्लो मुस्ताङ र मुक्तिनाथ क्षेत्रमा विद्युत आपूर्ति बन्द भएको छ । सोमबार साँझदेखि परेको अविरल वर्षा र हिमपातका कारण विद्युत सेवा अवरुद्ध भएको हो ।

मुस्ताङको थासाङदेखि कोरलानाकासम्मको ११ केभी प्रशारण लाईनको विद्युत पोल तथा तारहरुमा वर्षा र हिमपातले क्षति पु¥याएपछि निलगिरी उपभोक्ता सहकारी संस्था अन्तर्गत मुस्ताङको वारागुङ—३ समरदेखि कोरलासम्म र कागबेनीदेखि मुक्तिनाथ क्षेत्रका स्थानको विद्युत सेवा अवरुद्ध भएको निलगिरी उपभोक्ता सहकारी संस्थाका कार्यालय प्रमुख सनप्रसाद थकालीले जानकारी दिनुभयो ।

संस्थाले एक सूचना प्रकाशित गरी प्रतिकुल मौसमका कारण मुक्तिनाथ क्षेत्रमा अवरुद्ध विद्युत सेवा समाधानका लागि संम्वन्धित स्थानमा प्राविधिक टोली खटाईसकेको जनाएको छ ।

यसैगरी भारी हिमपातका कारण उपल्लो मुस्ताङमा अवरुद्ध विद्युत सेवा समाधानका लागि अनुकुल मौसम हुनासाथ सो क्षेत्रमा विद्युत मर्मत सुधारकार्य गर्न प्राविधिक टोली खटाईने संस्थाका कार्यालय प्रमुख थकालीले बताउँनुभयो ।